Жорий йилнинг 23 февраль куни Самарқанд | Kun.uz Telegram каналида “Кўприкнинг қулаб тушишини кутишаяптими?” номли мақола эълон қилинди.

Мақолада Нуробод тумани Узку қишлоғидан оқиб ўтувчи Эски анҳор канали устига қурилган кўприкни ёғин-сочин кунларда кўчада йиғилган сув ўпириб бораётганлиги, агар яна бироз эътиборсизлик қилинса, тез орада кўприк қулаб тушиб, яроқсиз аҳволга келиши мумкинлиги айтилади.

Нуробод тумани Узку ва янги Узку қишлоғи ўртасидан кесиб ўтувчи “Эски анҳор” канали устига ўрнатилган кўприк 1968 йилда қурилган бўлиб, кўприк лойиҳа асосида қурилмаганлиги, кўприк плиталарини кўтариб турадиган асос йўқолганлиги сабабли мазкур кўприк муддатини ўтаб авария ҳолатига келиб қолган.

Мазкур кўприк қишлоқ аҳолисини кунлик эҳтиёжи учун туман марказига, ўқувчиларни мактабга қатнашида хизмат қилаётган бўлиб, бугунги кунда кўприк авария ҳолатда бўлганлиги учун маҳаллий аҳолининг ҳақли эътирозига сабаб бўлмоқда.

Туман ҳокимлиги томонидан ушбу кўприк туман ҳокимлиги Ободонлаштириш бошқармаси балансига олинган бўлиб, 2021 йил манзилли дастур асосида 4,2 млрд. сўм маблағлар эвазига қайта қурилиши белгиланганлигини маълум қиламиз.